ຊັກຊວນເຮັດບຸນ

ຊັກຊວນເຮັດບຸນ (ບຸນບາບ)
ຍາມເຈົ້າເກີດມານັ້ນ	ບໍ່ມີຫຍັງຈັກຢ່າງ
ມາແຕ່ໂຕລ້ອນຈ້ອນ	ໂສ້ງໃນນ້ອຍກະບໍ່ມີ
ເຈົ້າມາສູ່ໂລກນີ້	ໄດ້ມີເປັນຕັ້ງຫຼາຍຢ່າງ
ທັງເງີນທອງລົດບ້ານ	ນາຮົ້ວໄຮ່ສວນ
ເຈົ້າມີນະຄອນຖ້ວນ	ສັບພະສິ່ງອຳນວຍສຸກ
ແຕ່ກະໜີຄວາມທຸກ	ຍ້ອນສັງຂານບໍ່ພົ້ນ
ບໍ່ວ່າຄົນມີໄດ້	ເປັນນຳກັນຄືເຈັບປ່ວຍ
ເຄີຍຫຼໍ່ງາມເປັນຂີ້ຮ້າຍ	ຍານຕວບຕ້ວຍຈ່ອຍຜອມ
ຜົມບໍ່ຍ້ອມຫງອກຂາວ	ສີດອົກເລົາແປ່ງແຊ່ງ
ແຮງເຄີຍຫຼາຍກະເຫຼືອໜ້ອຍ	ຖອຍຫຼັງລົ້ມທ່າດຽວ
ຫຼຽວເຫັນຄົນເປັນສ່ອງໜ້າ	ສີ່ຫູຕາໜ້າເປີງເຄີງ
ເບີ່ງຕັ້ງເຫີງກະຈັ່ງຮູ້	ຫຼານກູຕົວນີ້ນຶກວ່າໄຜ
ບາດເຖິງຄາວຕາຍນັ້ນ	ໄຜມັນຫ້າມບໍ່ຢູ່
ແມ່ນຊິລວຍລົ້ນຟ້າ	ເກີດມາແລ້ວກະຕ້ອງຕາຍ
ບໍ່ມີໃຜເອົາໄປໄດ້	ສັບພະສິ່ງເງີນທອງ
ຊັບສົມບັດທັງຜອງ	ເອົາໄປນຳບໍ່ໄດ້
ເງີນບາດດຽວລູກຫຼານໃຫ້	ກະຍັງຄົງຄືເກົ່າ
ເຂ່ຍເອົາຕອນແຈກເຂົ້າ	ພາກັນເອີ້ນເງີນປາກຜີ
ເຫຼືອແຕ່ຊົ່ວດີຮ້າຍ	ຕິດໂຕເຮົາໄປສູ່ບ່ອນ
ຕອນເຮົາຕາຍຈັ່ງຊິຮູ້	ວ່າຕາຍແລ້ວຫຍຸ້ງສ່ຳໃດ
ກຳດີດຶງເຮົາຂຶ້ນ	ກຳຊົ່ວຊາມຜັດມາຈ່ອງ
ຫວັງຊິໄດ້ຂຶ້ນສະຫວັນຟ້າ	ຜັດຈ່ອງໄວ້ເປັນເປດຜີ
ບ່ອນໃດດີຊິໄປເກີດ	ຜັດຍາດແຍ່ງບໍ່ທັນເຂົາ
ໄດ້ແຕ່ເນົາທົນທຸກ	ເປັນເປດຜີບໍ່ມີໝ້ອງຈັ້ງ
ຫວັງລູກຫຼານເຮັດບຸນໃຫ້	ຫຼາຍປີກະບໍ່ເຮັດຈັກເທືອ
ຊິເມືອບອກພວກທ່ານກະບໍ່ໄດ້	ຍົມມະບານຮ້າຍບໍ່ໃຫ້ມາ
ຍ້ອນຜະລາທານໜ້ອຍ	ຄອຍຖ້າບຸນເຮັດກຳແຕ່ງ
ແຮງບໍ່ພໍຊີ່ສົ່ງໄປເກີດໄດ້	ຍົມພະບານໃຫ້ຊ່ວຍງານ
ທັງລ້າງຈານລ້າງໝໍ້	ດັງໄຟໃສ່ໝໍ້ຂາງໃຫຍ່
ໄລ່ແທງພວກທີ່ເຮັດບາບຮ້າຍ	ຖີບລົງໝໍ້ແມ່ນເມື່ອຍຫຼາຍ
ຄັນແມ່ນເຮັດບຸນໄວ້	ເຖີງຍາມຕາຍຊິບໍ່ຍາກ
ຕາຍຈາກໄປມື້ນີ້	ມີຜູ້ເອີ້ນຂຶ້ນສະຫວັນ
ແຫ່ນຳກັນຍືດໆ	ຂຶ້ນສະຫວັນເມືອງມ່ວນ
ນາງຟ້າວົນໄປນອນຊ້ອນ	ເມືອງຟ້າຈັງແມ່ນຫຼາຍ
ສະນຸກບາຍສະນຸກຄັ້ນ	ສາວສະຫວັນຈົນວ່າເມື່ອຍ
ຜູ້ເພີນເຄີຍຂຶ້ນສະຫວັນບອກໄວ້	ໄດ້ຟັງແລ້ວໃຫ້ຮໍ່າຮອນ
ຕອນຍັງເປັນຄົນນັ້ນ	ໝັ່ນເຮັດບຸນເອົາໄວ້ແນ່
ບຸນບາບນັ້ນຂອງແທ້	ເບິ່ງແຍງເຈົ້າ
	ຍາມເມື່ອຕາຍພີ່ນ້ອງເອີຍ…