ຊັກຊວນເຮັດບຸນ

ຊັກຊວນເຮັດບຸນ
ບຸນເຮົາຫຼາຍຈັ່ງໄດ້ເກີດ	ເປັນມະນຸດ ຫຼື ຄົນ
ແມ່ນຊິທຸກສ່ຳໃດ	ກະຍັງມີເສື່ອຜ້າ
ມີປັນຍາພໍໄດ້ສ້າງ	ເຮືອນຊານບ້ານຊ່ອງ
ມີພໍ່ແມ່ພີ່ນ້ອງ	ລຸງປ້າໄດ້ເພີ່ງພາ
ມີວັດວາໄດ້ເພີ່ງຮ້ອນ	ສອນໃຈຢາມວ້າວຸ່ນ
ໄດ້ເຮັດບຸນສືບສ້າງ	ຖາງທາງຂຶ້ນສູ່ສະຫວັນ
ມື້ນີ້ນັ້ນ	ວັດມີງານບຸນ
ຮ່ວມສັດທາພີ່ນ້ອງ	ກິນທານສ້າງສ່ວນກຸສົນ
ຮ່ວມຜົນບຸນເອົາໄວ້	ເທື່ອຕາຍເກີດຊາດໃໝ່
ພໍໄດ້ຊູຊ່ວຍໃຫ້	ໄປເກີດພໍ້ບ່ອນດີ
ຄັນຢາກມີເປັນໄດ້	ໃຫ້ຕັ້ງຕໍ່ເຮັດບຸນ
ເອົາຄວາມດີ	ໃຫ້ຖືຮັກສາຄົງໝັ້ນ
ການກຸສົນສ້າງ	ສິນທານໃຫ້ໝັ້ນແກ່ນ
ວາງແຜນໄວ້ລ່ວງໜ້າ	ເຮັດໃຫ້ໄດ້ດັ່ງແຜນ
ມາຮອດແດນບຸນແລ້ວ	ເສີຍເລີຍມັນບໍ່ແມ່ນ
ບາງທີເມືອຈົນຮອດບ້ານ	ຈັງຄິດພໍ້ບໍ່ໄດ້ບຸນ
ເຊີນເຈົ້າລຸງເຈົ້າປ້າ	ອາວອາທຸກໆ ທ່ານ
ມາເຮັດທານສືບສ້າງ	ເປັນທຶນໄວ້ກ່ອນຕາຍ
ວາງແຜນການເອົາໄວ້	ຊິໄປເກີດເປັນຫຍັງ?
ຍາມເຮົາຍັງບໍ່ຕາຍ	ຢ່າລືມຕົນວ່າຍັງນ້ອຍ
ກຳເວນຄອຍຖ້າຈອບເຈົ້າ	ເຝົ້າແຍງທຸກເຊົ້າຄ່ຳ
ກຳບໍ່ເຄີຍລະເວັ້ນ	ບໍ່ເຫັນໜ້າແກ່ຜູ້ໃດ
ຄັນເຮົາເຮັດບຸນໄວ້	ແມ່ນກຳໄລ່ນຳຫຼັງ
ບຸນສິຄ່ອຍນຳທາງ	ໃຫ້ຫ່າງໄກກຳໄດ້
ຄືດັ່ງລົດຈັກໄດ້	ນ້ຳມັນດີຂີ່ງ່າຍ
ໝາຫຸ້ມໄລ່ບໍ່ຕ້ອງຢ້ານ	ມັນໄລ່ໄດ້ກະບໍ່ທັນ
ອານິດຈັງທ່ານນັ້ນ	ຄືໃຫ້ຮ່າງໃຫ້ມີ
ອານິດຂອງສິນ	ຄືໃຫ້ດີງາມພ້ອມ
ຫຼອມທັງມົດເຂົ້າ	ເປັນຮ່າງມີງາມຫໍ
ຄັນໄຜຢາກພົບພໍ້	ທານສິນນັ້ນໃຫ້ໝັ່ນທຳ ທ່ານເອີຍ...